Корбан Бердыевка кирәксез чит ил уенчыларының чираттагысы Казаннан китте
Рубен Рочина карьерасын Испания чемпионатында дәвам итә.
(Казан, 1 февраль, «Татар-информ», Фәрит Салихов). Казанның «Рубин» командасы ярымсакчысы, 26 яшьлек испан футболчысы Рубен Рочина карьерасын аренда хокукларында Испаниянең «Леванте» командасында дәвам итәчәк. Бу хакта «Рубин» клубы матбугат хезмәте хәбәр итте.
Рубен Рочина Казанга 2016 елны июлендә, командага баш тренер итеп Испания белгече Хавьер Грасия билгеләнгәч, килгән иде. Әмма командага Корбан Бердыев әйләнеп кайткач, төп составка эләгә алмады – бу сезонда 4 уенда гына катнашты.
Гомумән алганда, Рочина «Рубин» өчен 31 матчта чыгыш ясап, ике гол кертә алды.
Шулай итеп, Корбан Бердыевка кирәксез чит ил уенчылары Казаннан китеп бетте, диярлек. Моңа кадәр «Рубин»нан – Рагнар Сигурдссон, Мориц Бауэр, Янн М’Вила, Мийо Цакташ, Карлос Самбрано, Максим Лестьенн һәм Россия футболчысы Тарас Бурлак китеп барды. Китәргә тиешле камерун футболчысы Алекс Сонг әлегә башка клуб белән килешү төзелмәде.
Команда белән Төркиядәге җыеннарга дүрт кенә чит ил уенчысы алынды. Алар – Цезарь Навас, Гекдениз Карадениз, Реза Шакири һәм Сердар Азмун. Әлеге футболчылар Казанда калачак.