Конфедерацияләр кубогында Криштиану Роналдудан күпне көтәбез – Бруно Алвеш
Португалия футбол җыелмасы сакчысы журналистлар белән аралашты.
(Казан, 15 июнь, «Татар-информ». Конфедерацияләр кубогы кысаларында Казанда беренче уеннарын уздырырга җыенучы Португалия футбол җыелма командасы сакчысы, заманында Санкт-Петербургның "Зенит" клубы өчен чыгыш ясаган Бруно Алвеш матбугат конференциясендә каләм әһелләре белән аралашты.
"Без Конфедерацияләр кубогында әле беренче мәртәбә генә катнашсак та, дөньякүләм турнирларда катнашу тәҗрибәбез бар. Ләкин мондый турнирларда барысын да яңадан башларга кирәк. Биредә бер дәрәҗәдәге осталыкка ия командалар, үз континентларының җиңүчеләре җыелды. Көндәшлек җитди булачак. Тәҗрибә белән генә җиңүгә ирешеп булмый, уен кырында үзеңнең нәрсәгә сәләтле икәнеңне күрсәтергә туры киләчәк", – диде Бруно Алвеш.
Ул шулай ук Португалия җыелмасы һөҗүмчесе Криштиану Роналдуга карата булган игътибарга бәйле үз фикерен дә җиткерде, футбол йолдызын Португалиянең "поты" дип атады.