Көндез Татарстанда бераз кар, җил һәм -13 градуска кадәр салкын булуы көтелә
Бүген, 14 гыйнварда, Татарстанда элегрәк урнашкан аномаль салкын һава торышы саклана. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.
Республикада аязучан болытлы һава торышы булачак. Көндез урыны белән бераз кар явачак, Казанда явым-төшем көтелми.
Республикада көнбатыштан һәм көньяк-көнбатыштан секундына 7-12 метр тизлектә җил исәчәк. Юлларда бозлавык саклана.
Төнге салкыннардан соң көндезге сәгатьләрдә Татарстанда һава температурасы -13..-18 градус (ТР башкаласында -13..-15 градус) тәшкил итәчәк.
10-15 гыйнварда Татарстанда аномаль салкыннар аркасында кисәтү гамәлдә. Казан федераль университеты профессоры, география фәннәре докторы Юрий Переведенцев «Татар-информ» агентлыгына элегрәк белдергәнчә, гыйнварның икенче декадасында ТР башкаласында тәүлеклек уртача һава температурасы климатик нормадан 8 градуска түбәнрәк булачак.