Дин 2 август 2022 12:05

Киров өлкәсендә Әҗем авылы мәчетенең 10 еллык юбилеен билгеләп үттеләр

Скопировать ссылку

Киров өлкәсенең Әҗем авылында мәчет һәм чиркәү дистә ел янәшә тора. Әҗемдә мөселманнар күпкә азрак булуга карамастан, алар уртак көч белән мәчет төзи алган. Хәзерге вакытта бу эшне башлап йөргән мәрхүм Рифкать хәзрәт Закировны рәхмәт сүзләре белән искә алалар, ул 2012 елга кадәр Киров өлкәсе мөселманнары Диния нәзарәтен җитәкләгән. Бу хакта Россия мөселманнарының Диния нәзарәте матбугат хезмәте хәбәр итә.

«Бер ел элек яңа манара, ярымай куелды. Күптән түгел генә янкорма төзелде. Киләчәккә планнарыбыз зур. Аларны тормышка ашырырга авылдашлар ярдәм итә. Мин аларга чиксез рәхмәтле», - дип сөйли мәчет имамы Рәүф хәзрәт Вәлиев.

Юбилей уңаеннан Киров өлкәсе мөселманнары Диния нәзарәте рәисе Нияз хәзрәт Кашапов РФ мөселманнары Диния нәзарәте һәм Киров өлкәсе мөселманнары Диния нәзарәте исеменнән мәхәллә эшендә актив катнашкан һәркемгә Рәхмәт хатлары һәм бүләкләр тапшырды.

Бәйрәм көнендә Әҗем мәчете тарихы турында яңа китап та тәкъдим ителде. Аның авторы мәчетнең элеккеге имамы Эдуард Исламов барлык авылдашларын бәйрәм белән котлады һәм аның районда икенче мәчет булуын белдерде.

Сәхифәләр

Киров өлкәсендә Әҗем авылы мәчетенең 10 еллык юбилеен билгеләп үттеләр