Киров өлкәсендә «Россиянең татар авыллары» оешмасы призына хоккей ярышлары була
Нократ Аланы районы Урта Шөн авылында узачак турнирда Россия авылларыннан хоккей командалары катнашачак.
(Казан, 4 гыйнвар, «Татар-информ»). 26 гыйнварда Киров өлкәсендә «Россиянең татар авыллары» Бөтенроссия иҗтимагый оешмасы призына бозда алкалы хоккей буенча төбәкара ярышлар узачак. Бу хакта Бөтендөнья татар конгрессы матбугат хезмәте хәбәр итә.
Чара өлкәннәр арасында инде дүртенче тапкыр оештырыла. Турнирда Россия төбәкләреннән килгән авыл командалары катнаша.
Хоккей бәйрәме 12.00 сәгатьтә Киров өлкәсенең Нократ Аланы районы Урта Шөн авылында тантаналы төстә ачыла.
Турнирны Киров өлкәсе татарларының төбәкара иҗтимагый мәдәни-агарту оешмасы, «Россиянең татар авыллары» Бөтенроссия иҗтимагый оешмасы, Бөтендөнья татар конгрессы, Урта Шөн авыл җирле хакимияте, Урта Шөн авыл җирле хакимиятенең «Спорт-сәламәтләндерү үзәге» муниципаль казна учреждениесе оештыра.