Совет һәм Россия кино белгече, кинокритик һәм телекүзәтүче Юрий Богомолов вафат булды. Аңа 86 яшь иде. Бу хакта ТАССка аның улы, режиссер Константин Богомолов хәбәр итте.
«Бүген иртән Юрий Александрович вафат булды», - дип сөйләде агентлык әңгәмәдәше.
Юрий Богомолов сәнгать фәннәре кандидаты, кино, телевидение, театр теориясе һәм тарихы буенча китаплар һәм хезмәтләр авторы.
Ул 1937 елның 9 мартында Ленинградта туа. 1965 елда Бөтенроссия дәүләт кинематография институтын тәмамлый, «Известия» газетасында мәдәният бүлеге мөдире булып эшли, «Российская газета»да телекүзәтүче була, ә 2017 елның декабреннән «Сноб» журналында колонка алып бара.