КФУда туган телләр һәм әдәбият буенча Федераль олимпиаданың йомгаклау этабы узды
Бүген КФУның Филология һәм мәдәниятара багланышлар институтында Россия халыкларының туган телләре һәм әдәбияты буенча мәктәп укучыларының Федераль олимпиадасының йомгаклау этабы узды.
«Безнең Россия Федерациясендә дә, республикада да бик күп олимпиадалар, конкурслар уза. Ягъни, яшьләргә үзләрен сынау һәм киләчәктә яңа мөмкинлекләр алу өчен шартлар тудырыла. Россия халыкларының туган телләре һәм әдәбияты буенча мәктәп укучыларының Федераль олимпиадасы бик үзенчәлекле. Монда Россиянең 50ләп төбәгеннән укучылар катнаша», – диде Филология институтының директоры, профессор Рәдиф Җамалетдинов.
Олимпиада Россия Федераль Җыенының Федерация Советы ярдәмендә, 18 югары уку йорты катнашында уздырыла. «Безнең университет бу олимпиадада өченче тапкыр катнаша. Олимпиадада катнашу һәм җиңү укучыларга бик зур мөмкинлекләр бирә. Җиңүчеләр «педагогик юнәлеш» буенча укырга кергәндә, рус теленнән яки җәмгыять белеменнән Бердәм дәүләт имтиханында 75 балл җыя алсалар, алар башка имтиханнарны тапшырып та тормыйлар, турыдан-туры үзләре сайлаган белгечлек буенча укырга керәләр», – ди Рәдиф Җамалетдинов.
Олимпиада Россия Мәгариф һәм фән министрлыгының 2023/2024 уку елына мәктәп укучылары олимпиадалары исемлегенә керә (№823, Төньяк-Көнчыгыш мәктәп укучылары олимпиадасы, «Педагогик белем бирү» предметы).
- Олимпиада 29 тел һәм әдәбият буенча уздырыла. Бу - авар, Алтай, башкорт, даргин, долган, Карелия, Кетск, кырым-татар, комык, лакск, лезгин, мари, мукшы, ненец, рус, табасаран, татар, тыва, удмурт, украин, хакас, чечен, чуваш, чукот, эвен, эвенк, эрзә, юкагир, якут телләре.
- Олимпиадада 8-11 сыйныф укучылары катнаша.
