КФУда беренче тапкыр Әмирхан Еникинең “Рәшә” повесте буенча спектакль куелачак
Режиссер һәм сценарий авторы Илфак Хафизов язучының спектакль өчен теле бик уңай булуын әйтте.
(Казан, 28 апрель, “Татар-информ”, Зилә Мөбәрәкшина). Иртәгә 14:00 сәгатьтә КФУның Филология һәм мәдәниятара багланышлар институтында күренекле татар язучысы Әмирхан Еникинең “Рәшә” повесте буенча спектакль куелачак. Бу хакта “Татар-информ” хәбәрчесенә “Мизгел” яшьләр театры җитәкчесе Илфак Хафизов хәбәр итте.
- Спектакльнең режиссеры һәм сценарий авторы – Илфак Хафизов. Спектакльдә Казан федераль университетында белем алучы төрле курстагы студентлар катнаша.
Илфак Хафизов “Рәшә” әсәренең шактый күләмле – 300 битлек булуына басым ясады. “Иң кыены – сценарийга барлык әйберне дә кертә алмау. Миңа үз-үзем белән көрәшергә туры килде. Уйныйсы килгән сәхнәләр бар, әмма, вакытка сыешмау сәбәпле, алар кыскартылды”, - диде ул.
“Сценарийга төп линияне дә алып чыгарга кирәк булды. “Рәшә”дә казыныр әйберләр күп, шуңа күрә дә баштан ук нәрсә куярга кирәклеген билгеләдем. Беренче сорау – теманың актуальлеге. Әмирхан Еники сугыш елларын шулай сурәтләсә дә, ул бүгенге көндә дә актуаль кала бирә”, - дип ачыклык кертте режиссер.
“Мизгел” театры җитәкчесе Рәшидә персонажын хыялый, мәхәббәтле һәм тугры кеше булуын әйтте. “Аның капма-каршысы – Зөфәр, санап, хисап белән генә эш итә, озак уйлап, “дөрес” яшәргә өйрәнгән, аңа ялгышырга ярамый. Бу персонажлар арасындагы мөнәсәбәтне ачасы килде”, - ди ул.
Режиссер Әмирхан Еники телен спектакль өчен бик уңай булуын искәртте. “Миңа аерым диалоглар уйлап чыгарып язарга туры килмәде. Бу яктан Әмирхан ага – даһи. Әсәрдә дә әйтергә теләгән фикерләре бар. Спектакльгә көтеп калам”, - дип сөйләде ул.