КФУ профессоры май аенда Казанда һава торышына фаразларын әйтте
Быел Казанда гыйнвар, февраль һәм март айларында һава температурасы нормадан шактый югары булды.
(Казан, 28 апрель, «Татар-информ», Наталья Рыбакова). Май аенда Казанда һава температурасы нормага якын булачак. Бу хакта «Татар-информ»га бүген КФУның метеорология, климатология һәм атмосфера экологиясе кафедрасы мөдире, профессор, география фәннәре докторы Юрий Переведенцев хәбәр итте.
«Май аенда Татарстан башкаласында уртача айлык температура норма буенча 13,5 градус тәшкил итәчәк, ә уртача айлык явым-төшем нормасы 39 миллиметр була. Россия Гидрометеорология идарәсе башлангыч фаразларына караганда, башкалада май аенда температура нормага якын булачак», — диде спикер.
Әңгәмәдәш шулай ук быел Казанда гыйнвар, февраль һәм март айларында һава температурасы нормадан шактый югары иде, диде. Әлеге нормалар 30 ел эчендә — 1981 елдан 2010 елга кадәр исәпләп чыгарылган. Шунысы кызык, соңгы вакытта һәр ел алдагы елдан бераз җылырак була.