КФУ профессоры иң салкын кышлы елларны искә төшерде
Юрий Переведенцев бу көннәрдә салкыннарның күбрәк Арктика йогынтысында булганын әйтте.
(Казан, 18 ноябрь, «Татар-информ», Гөлнар Гарифуллина). Казанда соңгы 42 елда үтә дә салкын кышлар күзәтелмәгән. Бүген Казан федераль университетының метеорология, климатология һәм атмосфера экологиясе кафедрасы мөдире, профессор Юрий Переведенцев «Татар-информ» агентлыгында матбугат конференциясендә иң салкын кышларны искә төшерде.
«Соңгы бик салкын кышкы көн 1978 елның 31 декабреннән 1979 елның 1 гыйнварга каршы төндә булган, һава температурасы 44 градуска кадәр төшкән. Аэропорт тирәсендә 47 градус булган. 42 ел узды — андый салкыннар булганы юк», — диде.
Профессор 1941-1942 елларда да кыш салкын булганын, Казанда 44-45 градус булганын искәртте. «Андый салкыннарның тәэсире бик начар», — диде.
Юрий Переведенцев бу көннәрдә салкыннарның күбрәк Арктика йогынтысында булганын әйтте. «Төньяктан һава агымнары булды, кар да шуңа әз төште», — диде. Профессор, гадәттә, ноябрь, декабрьдә кояшлы көннәр аз булуын, нигездә, көннәр болытлы булуын, кар явуын билгеләп узды. «Кар Урта диңгез ярыннан циклон килгәндә була, бу вакытта, кагыйдә буларак, җылыта, юеш кар ява», — диде.
Сынамышларга карасак, профессор сүзләренчә, гадәттә, бик кырыс салкыннар ниндидер даталар белән бәйле. 19 декабрьдә Никольск салкыннары, 7 гыйнварда Раштуа салкыннары, 19 гыйнварда Крещение салкыннары була.
«Андый сынамышлар 60-65 процент очракта гына туры килә. Кар төшүгә килгәндә, аерма зур булырга мөмкин. Беренче тотрыклы кар катламы 9 октябрьдә дә, 29 декабрьдә дә ята ала. Шундый өч ай диярлек диапазон. Сынамышлар туры килмәскә дә мөмкин», — диде Юрий Переведенцев