«Керәшен чибәре» җиңүчесе Анжелика Павлова: Туган телемне – Тукай телен бик яратам
Анжелика Павлова табибә булырга хыяллана.
«Керәшен чибәре-2023» бәйгесе җиңүчесе Анжелика Павлова туган телен – татар телен яратуын әйтте.
Быел «Керәшен чибәре» республика бәйгесе җиңүчесе Казан медицина көллияте студенты Анжелика Павлова булды. Ул бәйгедән соң «Татар-информ» хәбәрчесенә уй-кичерешләре турында сөйләде. Республика күләмендәге бәйге 25 ел буе үткәрелә. Биредә кияүгә чыкмаган, яше 28дән артмаган кызлар катнаша.
«Һәр бәйге тырышлык, түземлек , сабырлык һәм төпле белемле булуны таләп итә. Иң элек, халкымның тормыш-көнкүрешен, бәйрәмнәрен барлап чыктым, гореф-гадәтләрен, йолаларын искә төшердем. Аннары үз-үземне тиешле дәрәҗәдә тотарга әзерләдем. Җиңү беркемгә дә җиңел бирелми инде. Бик авыр булды, дип тә әйтмәс идем, чөнки янымда һәрвакыт әти-әни, туганнарым, гомер иткән әби-бабайларым булды. Рәхмәт аларга! Аларның киңәшләренә, тормыш тәҗрибәләренә нык таяндым», - диде Анжелика Павлова.
Анжелика Павлова бәйгегә җиңү яулар өчен түгел, ә үзен сынап кара өчен килгән. «Беренче өчлеккә кереп булмасмы дигән уем булды, әмма беренче урын ук булыр димәгән идем. Шатландым, билгеле. Беркемнән дә оялмадым, күз яшьләрем битем буйлап агып төште. Әле эмоцияләрдән арынып бетеп булмый, күп котлаулар кабул итәм, шатлык хисләрем йөрәгемнән ташып чыга», - диде ул.
Җиңүче кыз табибә булырга хыяллануын әйтте. «Алга таба да планнар зурдан. Бер урында гына тукталып калмаска, алга барырга, керәшен дөньясында кайнарга, булдыра алганча үз өлешемне кертеп яшәргә уйлыйм. Исән-сау гына укуымны дәвам итәргә, табибә булырга, халкымның сәламәтлеге сагында торырга хыялланам», - диде Анжелика Павлова.
Анжелика Павлова «Татар-информ» хәбәрчесенә татар теленә карата мөнәсәбәтен белдерде. «Мәктәптә 11 ел русча укыдым. Татарча аралашам, туган телемне – Тукай телен бик яратам. Ана телемнең бөеклегенә мин шатланып яшим. Ике телне дә бер үк дәрәҗәдә беләм. Теле юкның - көне юк. Телне, иң элек, гаиләдә сакларга, гаиләдә үз телеңдә аралашырга кирәк. Без гаиләдә татарча сөйләшәбез. Әгәр тел югала икән , халык та юкка чыга», - диде ул.