Дин 15 гыйнвар 2018 15:13

Казыйлар талак буенча нигезләмә эшлиләр

Дин белгечләре утырышта талакның кайсы очракларда дөрес яки дөрес булмавын өйрәнгән.

Скопировать ссылку

(Казан, 15 гыйнвар, "Татар-информ"). Бүген Казанның Галиев мәчетендә ТР мөселманнары Диния нәзарәтенең Казыйлар шурасының чираттагы утырышы узды. Хәзрәтләр "Талак әйтелгәндә ислам хокукы кагыйдәләрен куллану турында" Нигезләмәне эшләү буенча фикер алышты, дип хәбәр итә Татарстан мөселманнарының Диния нәзарәте матбугат хезмәте.

"Татарстанның төбәк казыйлары никах мәсьәләләре буенча үз тәҗрибәләреннән чыгып сорауларын юлладылар. Очрашуда барлык төбәк казыйлары, Татарстанның баш казые киңәшчесе Рөстәм хәзрәт Нургалиев катнашты, ул шәригать китапларында хәнәфи мәзһәбе буенча аерылышуга (талак әйтүгә) кагылышлы сорауларга җаваплар ирештерде." дип язылган хәбәрдә.

Дин белгечләре утырышта Нигезләмәгә әйтелгән талакның кайсы очракларда дөрес яки дөрес булмавын өйрәнгән, шулай ук ЗАГСта теркәлү һәм аерылу буенча шәригать күзлегеннән бәя биреп, казыйлар Нигезләмәгә үз тәкъдимнәрен җиткергән.

Диния нәзарәте матбугат хезмәте хәбәрендә әйтелгәнчә, Казыят әгъзалары имамнарга никах һәм талак буенча таратылачак документларның хатын-кызларның хокукларын яклау һәм гаилә институтын ныгыту максатларыннан чыгып эшләнүен ассызыклый.

#казый #талак

Сәхифәләр

Казыйлар талак буенча нигезләмә эшлиләр