Казан метросы стандарт хәрәкәт графигына кайта
Бүген, 1 сентябрьдә, Татарстан башкаласы метрополитены стандарт хәрәкәт графигына кайта. Бу хакта «Метроэлектротранс» муниципаль унитар предприятиесе матбугат хезмәте хәбәр итә.
Хәзер эш көннәрендә иртәнге һәм кичке пик сәгатьләрендә линиядә 11 электр поезды йөриячәк. Алар арасындагы интервал 5 минут 8 секунда кадәр кыскара. «Бу көннән-көн арта барган пассажирлар агымын көйләргә ярдәм итәчәк һәм сәфәрләрне тагын да уңайлырак итәчәк», – дип искәрттеләр транспорт предприятиесендә.
Актуаль расписание белән kazanmetro.ru сайтында һәм һәр станциядә урнаштырылган мәгълүмат стендларында танышырга мөмкин.
ТР башкаласы метросында җәйге хәрәкәт графигы 1 июльдән гамәлдә булды.