Казанның «Ярдәм» бульварында инклюзив дискотека узачак
Скопировать ссылку
Бүген, 11 августта, Серов урамындагы «Ярдәм» бульварында ачык һавада беренче инклюзив дискотека узачак. Бу хакта «Игелекле Казан» коммерцияле булмаган автоном оешмасы хәбәр итә, дип тапшыра Казан мэриясе матбугат хезмәте.
Кичә кунакларын бию мастер-класслары, диджейлардан музыкаль сетлар, төрле елларның хитлары һәм интерактив программалар көтә. Оештыручылар инвалидлыгы булган һәм булмаган кешеләр җәйге кичне бергә үткәрә ала торган мәйданчык әзерләгән.
Чара 19:00 сәгатьтә башлана. Катнашу өчен теркәлергә кирәк.
Инклюзив дискотеканы «Игелекле Казан» оешмасы Казан шәһәр Думасы инициативасы белән Казанның Парклар һәм скверлар дирекциясе ярдәмендә оештыра.