Казанның 130нчы мәктәбендә махсус операциядә һәлак булучылар истәлегенә почмак оештырыла
Казанның Россия Федерациясе Герое майор С.А. Ашихмин исемен йөрткән 130нчы мәктәбендә махсус хәрби операциядә һәлак булучылар истәлегенә почмак барлыкка киләчәк. Бу мәктәпне тәмамлаган ике хәрби махсус операциядә һәлак булган, почмакта алар турында мәгълүмат, шәхси әйберләр урнаштырылачак.
Махсус хәрби операциядә һәлак булган Марсель Минкин һәм Руслан Семенов истәлегенә почмакны оештыру эшенә мәктәп директоры урынбасары, татар теле һәм әдәбияты укытучысы Венера Сафина алынган.
«Махсус хәрби операциядә һәлак булган ике укучыбыз бар, аларның исемнәрен мәңгеләштүгә үзебезнең өлешне кертәсе килә. Почмак ясарга булдык. Мәктәптә Герой Сергей Ашихминга багышланган музей бар. Почмак музей кысаларында булырмы, аерым бүлмәдә ясалырмы – әлегә тәгаенләштерәбез. Анда медаль, грамоталарын урнаштырырбыз. Көндәлек яки дәфтәрләре булса да, әйбәт булыр, җыеп бетерәсе иде», – дип сөйләде ул.
Руслан Семенов декабрь аенда вафат булды. «Интертат» сайтында Руслан Семенов турында мәкалә чыккан иде. Аның әнисе Гөлсинә Семенова үзе дә мәктәпкә тәкъдим белән чыккан булган. «Мине хупладылар гына, каршы килүче булмады. Мәктәп музее белән дә таныштырдылар.. Улымның әйберләрен алып килүемне сорадылар», – диде ул.