Казанның тугыз мәйданында авыл хуҗалыгы ярминкәләре узачак
Татарстан фермерларына сәүдә итү өчен 270 урын биреләчәк.
(Казан, 23 август, «Татар-информ»). Казанда көндәлек авыл хуҗалыгы ярминкәләре үткәрү өчен тугыз мәйданчыкны расладылар. Бу турыдагы карар Казан Башкарма комитетының документлар җыентыгында урнаштырылган.
Идел буе районында ярминкәләр Җиңү проспекты, 50а һәм Ю.Фучик, 72, ә Авиатөзелеш районында Беломорск һәм Гудованцев урамнары чатында, Киров районында Батыршин, 20 адреслары буенча узачак.
Совет районында Липатов, 7, Зәкиев, 12, шулай ук Ю. Фучик һәм Ломжинск урамнары чатында авыл хуҗалыгы продукциясе сатып алып булачак.
Яңа Савин районында ярминкәләр Академик Лаврентьев, 10 адресы буенча узачак.
Һәр сәүдә ноктасында фермерларга 16-68, ә барлыгы 270 сәүдә урыны тәкъдим ителәчәк.