Казанның төп чыршысы 24 декабрьдә ачыла
35 метрлы чыршыны «Казан» Гаилә үзәге янында урнаштырдылар.
(Казан, 14 декабрь, «Татар-информ»). 24 декабрьдә «Казан» Гаилә үзәге янында шәһәрнең үзәк чыршысын ачу тантанасы узачак. Эшлекле дүшәмбе киңәшмәсендә шул хакта билгеле булды.
«24 декабрьдә „Казан“ Гаилә үзәге янында шәһәрнең үзәк Яңа ел мәйданчыгын ачу тантанасы була. Биредә концерт программасы оештырылачак, шәһәр символикасы һәм иллюминация белән бизәлгән сәүдә рәтләре „үсеп“ чыгачак», - диелә эшлекле дүшәмбе киңәшмәсе материалларында.
Чаралар санитар нормалар һәм социаль дистанцияне үтәп оештырылачак.
«Татар-информ» агентлыгы элегрәк хәбәр иткәнчә, Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсе татарстанлыларга Яңа ел төнендә чыршы бәйрәмнәре һәм боз шәһәрчекләренә килергә рөхсәт итте.