Казанга эшлекле сәфәр белән Венгриянең милли үсеш министры Миклош Шестак килде
Казан Кремлендә үтәчәк очрашуда Татарстан белән Венгрия арасында сәүдә-икътисад һәм гуманитар элемтәләрне ныгыту буенча фикер алышу булачак.
(Казан, 2 март, «Татар-информ»). Бүген Татарстанга эшлекле сәфәр белән Венгриянең милли үсеш министры Миклош Шестак килде. Бу хакта Татарстан Хөкүмәтенең рәсми сайтында хәбәр ителә.
«Казан» халыкара аэропортында кунакны Татарстан Республикасы Премьер-министры Илдар Халиков каршылады. Казанда сәфәре барышында Миклош Шестак Татарстан Президенты Рөстәм Миңнеханов белән очрашуы ниятләнелгән. Казан Кремлендә Президент резиденциясендә үтәчәк очрашуда Татарстан белән Венгрия арасында сәүдә-икътисад һәм гуманитар элемтәләрне ныгыту буенча фикер алышу булачак.
Моннан тыш, Миклош Шестак Казандагы Венгрия генераль консуллыгында булырга, шулай ук Татарстан инвестиция агентлыгында узачак «Агромир-Казан» проекты презентациясе белән танышырга ниятли.