«KazanForum»ның мәдәни программасында татар фильмнары күрсәтеләчәк
«Россия – ислам дөньясы: KazanForum» ХV Халыкара икътисади форумының мәдәни программасында Татарстанда төшерелгән фильмнар күрсәтеләчәк.
«Форум өчен «Татаркино» оешмасы соңгы елларда төшерелгән өч иң яхшы киноны сайлап алды. 15 - 17 май көннәрендә аларны форум кунаклары гына түгел, теләгән һәр кеше карый алачак», – дип хәбәр итә «Татаркино»ның матбугат үзәге.
15 майда режиссерлар Айназ Мөхәммәтҗанов һәм Рәмис Нәҗмиев төшергән «Ибн Фадлан» тулы метражлы фильмы күрсәтелә. 16 майда Илдар Ягъфәровның «Исәнмесез?» фильмын, 17 майда Ирек Хафизов һәм Әмир Галиәскаровның «823-й километр» фильмын карарга мөмкин.
Сеанслар 18:00 сәгатьтә башлана.
Барлык фильмнар инглиз теленә субтитрлар белән күрсәтелә.