«KazanForum» кысаларында Болгарда көрәш буенча БДБ илләре чемпионаты узачак
15–17 майда борынгы Болгар шәһәрендә милли көрәш буенча Бәйсез Дәүләтләр Берлеге чемпионаты узачак. Анда Бәйсез Дәүләтләр Берлеге илләреннән килгән йөздән артык көрәшче – милли көрәш төрләре буенча үз илләренең чемпионнары катнашачак, дип көтелә. Спортчылар 10 авырлык категориясендә бил алышачак. Бу хакта Россия Көрәш федерациясе матбугат хезмәте хәбәр итә.
Турнир берничә этапта узачак – Мәскәүдә квалификация ярышлары, Болгар шәһәренең «Олимп» спорткомплексында беренчел ярышлар һәм 17 майда – тантаналы чаралар һәм финал ярышлары.
Финал өлеше «Россия‑Ислам дөньясы: KazanForum» XVII халыкара икътисади форумы мәдәни программасының кульминацион өлеше булган «Изге Болгар Җыены» Корылтае кысаларында Болгар музей-тыюлыгы территориясендә узачак.
«Чара Бәйсез Дәүләтләр Берлеге илләреннән иң көчле көрәшчеләрне берләштерәчәк һәм төбәкнең спорт һәм мәдәни календаренда әһәмиятле вакыйга булачак», – дип хәбәр итә оештыручылар.