Казанда «Яшәү рәвеше – мәдәни код» V милли мәдәниятләр фестивале уздырыла

22 июльдән 26 июльгә кадәр Казанда «Яшәү рәвеше – мәдәни код» V милли мәдәниятләр фестивале оештырыла. Кунакларны традицион һөнәрчелекне һәм халык сәнгатен саклауга һәм танытуга багышланган эчтәлекле мәдәни чаралар көтә. Быел бу зур вакыйганы беренче тапкыр яңа мәйданчыкта – Уникаль осталык үзәгендә оештыралар. Фестиваль кысаларында декоратив-гамәли сәнгать осталарыннан иҗади остаханәләр әзерләнгән. Килүчеләр кабатланмас алымнар белән таныша, төрле һөнәрләрдә үз көчләрен сыный алачак.

23 июльдә көн дәвамында (11:00–18:00) агачтан бизәкләр кисү осталыгы буенча укулар була. Көндезге 12:00 дән 13:30 га кадәр Гжель стилендәге фарфор эшләнмәләргә рәсем ясап карарга, ә кичке 17:00 дә металлны Урал бизәкләре белән ямьләндерү остаханәсенә керергә мөмкинлек бар.

24 июльдә исә фестиваль кунакларын чын төрлелек көтә: 11:00 дән 19:00 га кадәр агач кисү буенча укулар дәвам итәчәк. 12:00–13:30 сәгатьтә металл эшләнмәләрне Урал үрнәкләре белән бизәргә өйрәнеп булачак. Аннары, 14:00 тән 16:00 га кадәр татар милли тамбурлы чигү ысулы тәкъдим ителәчәк. Ә бу искиткеч көн 16:00 дан 18:00 гә кадәр кабаттан Гжель стилендәге фарфор эшләнмәләргә рәсем ясау остаханәсе белән тәмамланачак.

25 июльдә программа яңа юнәлешләр белән тулыланачак. Агачтан махсус ысул белән кисеп бизәкләр ясарга өйрәнүдән тыш (11:00–19:00), фарфор эшләнмәләргә рәсем төшерү (12:00–13:30) һәм «Подорожница» дип аталган чүпрәк курчакны ясау (14:00–15:00) буенча мастер-класслар булачак. Көннең икенче яртысында исә металл эшләнмәләрне Урал үрнәкләре белән бизәү (15:30–16:30) һәм Балык Бистәсенең челтәр үрү осталыгы (16:30–18:00) тәкъдим ителәчәк.Фестивальнең йомгаклау көнендә, 26 июльдә, кунакларны «Тырнак алмалау» — тасмалы аппликация серләре мастер-классы (10:00–11:00) көтә. Шулай ук агачтан кисеп бизәкләр ясау (11:00–19:00), металлны Урал үрнәкләре белән бизәү (11:00–12:30) һәм Гжель стилендәге фарфор эшләнмәләргә рәсем ясау (12:30–14:00) буенча остаханәләр узачак.

Биш көн дәвамында халык нәфис һөнәрчелеге ярминкәсе эшләячәк, осталарның эшләнмәләреннән торган күргәзмәләр һәм фестивальдә катнашучылар белән очрашулар узачак. Моннан тыш, фестиваль кысаларында Россия һәм чит ил дизайнерлары катнашында этник мода күрсәтүләре, шулай ук халык һөнәрчелеген, заманча милли дизайнны һәм иҗади индустрияләрне үстерүгә багышланган эшлекле һәм белем бирү чаралары оештырылачак.