Спорт 15 октябрь 2017 09:12

Казанда волейбол буенча Россия кубогы ярымфиналының соңгы уеннары уза

"Зенит" командасы бүген Красноярскиның "Енисей" волейболчылары белән уйный.

Скопировать ссылку

(Казан, 15 октябрь, “Татар-информ”, Фәрит Салихов). Казанда ир-егет волейбол командалары арасында Россия кубогы ярышларының ярымфинал этабын төгәлләү өчен соңгы тур уеннарын гына уздырасы калды.

Казанның “Зенит” волейболчылары ике уенны да җиңү белән төгәлләде. Кичә Владимир Алекно шәкертләре Уфаның “Урал” командасыннан өстен чыкты – 3-0 (25:18, 25:23, 25:16). Ә икенче пар очрашуында “Енисей” волейболчылары “Дагыстан” клубын отты – 3-0 (25:23, 25:19, 25:22).

Шулай итеп, ике тур уеннан соң “Зенит” 6 очко белән 1 нче урынга урнашты. “Енисей” белән “Урал”ның 3әр очкосы бар, ә “Дагыстан” очко җыя алмады.

Башкаланың “Санкт-Петербург” волейбол үзәгендә бүген Казанның “Зенит” командасы Красноярскиның “Енисей” (17.30 сәгатьтә), Махачкаланың “Дагыстан” волейболчылары Уфаның “Урал” клубы белән (15.00 сәгатьтә) көч сынашачак.

Россия кубогының “Дүртлек финалы”на төркемдәге бер команда гына чыга. Беренче урынны кулдан ычкындырмас өчен “Зенит”ка бүгенге уенда бер партиядә җиңү дә җитә.

#Волейбол #Зенит

Сәхифәләр

Казанда волейбол буенча Россия кубогы ярымфиналының соңгы уеннары уза