Казанда узачак DigitalSkills чемпионатына Кытай, Казахстан һәм Үзбәкстаннан 47 вәкил килә
20-23 сентябрьдә Татарстан башкаласында, «Казан Экспо» халыкара күргәзмә үзәгендә цифрлы технологияләргә багышланган DigitalSkills 2023 дигән V тармак чемпионаты узачак. Чарага Россиядән генә түгел, дустанә булган чит илләрдән дә 338 IT-белгеч килә. Ярышлар мәгълүмати һәм цифрлы технологияләр өлкәсендә 30 компетенция буенча үткәреләчәк.
Чемпионатта катнашу өчен кече, урта һәм зур бизнес предприятиеләре хезмәткәрләре, шулай ук югары һәм урта белем бирү учреждениеләре студентлары заявка биргән.
Казахстан, Кытай, Кыргызстан һәм Үзбәкстаннан килгән 47 конкурсант бер-берсе белән көндезге форматта ярышса, Әрмәнстан, Беларусь, Бразилия, Гана, Һиндстан, Иран, Малайзия, Берләшкән Гарәп Әмирлекләре, Филиппин, Көньяк Африка Республикасы, шулай ук Казахстан, Кытай, Кыргызстан һәм Үзбәкстан вәкилләре дистанцион форматта чыгыш ясаячак.