Казанда узачак БРИКС илләре уеннарына татар көрәше дә кертелгән
Скопировать ссылку
12-24 июнь көннәрендә Казанда БРИКС илләре уеннары узачак. Дөньякүләм ярышларга татар көрәше дә кертелгән. Бу хакта «Татар-информ»да узган матбугат очрашуында ТР спорт министрының беренче урынбасары Хәлил Шәйхетдинов сөйләде.
«Безнең татар көрәшен дөньяга таныту мөмкинлегебез булды – без аны БРИКС уеннарына кертә алдык. Бу безнең көрәшне таныту, җәелдерү. Бик файдалы, кирәкле, урынлы һәм бик җавапы эш, дип саныйм», – диде ул.
БРИКС уеннарында катнашу өчен сайлап алу ярышлары була. Уеннарда Россия җыелма командасына үтүче көрәшчеләр катнаша. «Мин Татарстанда яшим, Татарстан көрәшчесе, дип кенә узып булмый», – дип аңлатты Хәлил Шәйхетдинов.
Фото: © «Татар-информ», Солтан Исхаков