Казанда укучы Кырым студентлары мөселманча яшәү мөмкинлекләре өчен мөфтигә рәхмәт әйтте
Татарстанда Кырымнан килгән илледән артык студент укый.
(Казан, 19 гыйнвар, "Татар-информ"). Кырымнан Казанга килеп укучы студентлар Татарстан Диния нәзарәтендә очрашуда Камил хәзрәт Сәмигуллинга дин кануннары кушканча яшәү мөмкинлекләре тудырылганы өчен рәхмәт әйтте. Бу турыда Ниния нәзарәте матбугат хезмәте хәбәр итте.
Мөфти төрле уку йортларында, аерым алганда, Казан инновация университетында укучы студентлар белән очрашты. Татарстанда Кырымнан килгән илледән артык студент укый.
Студентлар мөселман мәхәлләләренең оешып эшләү тәртипләре, хәләл индустриянең үсеше, дини оешмаларның эшчәнлеге, республиканың милли үзенчәлекләренә кагылышлы сораулар биргән. Мәчет салу, аларның финанслануы бәйле нечкәлекләрне үз төбәкләре белән чагыштырган.
Мөфти Камил хәзрәт Сәмигуллин нәзарәт үз эшчәнлегендә динебезнең традицияләрен һәм өстенлекләрен аңлаешлы һәм популяр формада җиткерү өчен төрле ысуллар һәм алымнар куллануы, медиа чаралары, социаль реклама, нәшрият, фильмнар төшерү, акцияләр, ачык бәхәсләр һәм лекцияләр оештырылуы турында сөйләгән.
