Казанда тугыз катлы йортта чыккан янгынны видеога төшергәннәр
Янгын Зәкиев урамындагы 37б номерлы йортында булган.
(Казан, 21 май «Татар-информ»). Шаһитлар Казанда тугыз катлы йортның ут ялмап алган балконын видеога төшергән. Кадрлар белән социаль челтәрдән файдаланучылар уртаклашты.
Видеода күренгәнчә, көчле ялкын телләре өченче каттагы фатир балконы тәрәзәләреннән чыга.
«Янгын Зәкиев урамындагы 37б номерлы йортның балконында булды. Янгын сүндерүчеләр утны оператив рәвештә сүндерде», – дип сөйләделәр Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә.
Гадәттән тыш хәлләр министрлыгында әйтүләренчә, бу хәл нәтиҗәсендә берәү дә зыян күрмәгән, ә йортта яшәүчеләр мөстәкыйль рәвештә эвакуацияләнгән.