Казанда торак йортта янгын чыга язган
Зыян күрүчеләр юк.
(Казан, 26 декабрь, «Татар-информ», Гадел Әхмәтҗанов). Бүген Казанның Җиңү Проспектында урнашкан 138 йортта янгын чыга язган. Бу турыда «Татар-информ»га шул йортта яшәүчеләрнең берсе хәбәр итте.
Иртәнге сәгать 9лар тирәсендә йортта яшәүчеләр төтен исен сизеп ала. Өстәге катны төтен чолгап алган була. Кешеләр тиз арада урамга чыга. Зыян күрүчеләр юк.
Берничә минуттан янгын сүндерүчеләр килеп җитә һәм тикшерү эшләрен башлый. Алар әйтүенчә, хәзерге вакытта йортта яшәүчеләргә куркыныч янамый.
Беренче фаразлар буенча, янгынга баскыч мәйданчыгындагы сүнеп бетмәгән тәмәке сәбәпче булырга мөмкин.
Биредә яшәүчеләр сүзләренчә, моңа кадәр дә йортта төтен исе чыгу очраклары күзәтелгән. Ул вакытта да чыганак тәмәке төпчеге җыелган савыттан булган.
