Казанда «Татмедиа» Яшьләр советының беренче утырышы узды
Бүген «Татмедиа» Республика матбугат һәм массакүләм коммуникацияләр агентлыгында беренче мәртәбә Яшьләр советы очрашуы узды. Очрашуга төрле массакүләм мәгълүмат чаралары вәкилләре җыелды.
Җыелышта советның максатын да билгеләделәр – яңа буын медиа вәкилләре һәм җитәкчелек арасында күпер булу һәм бергәләп Татарстанда мәгълүмат киңлегенең киләчәген булдыру, шулай ук яшь һәм инициативалы белгечләрне берләштерү, аларны медиаиндустриядәге төп процессларга җәлеп итү.
«Без бу советны медиакиңлек чикләрен киңәйтү һәм ачык диалог өчен мәйданчык ясау өчен булдырабыз. Бу аралашуның ике як өчен дә файдалы булуын телибез. Сезнең тавыш, сезнең идеяләр безгә гаять мөһим», – дип мөрәҗәгать итте катнашучыларга «Татмедиа» агентлыгы җитәкчесе Айдар Сәлимгәрәев.
Фото: © «Татар-информ», Рамил Гали
Агентлык җитәкчесе урынбасары Диана Василова бурычларны һәм эш форматын атады. «Без төрле массакүләм мәгълүмат чараларыннан төрле кешеләрне җәлеп итәргә, һәрвакыт элемтәдә булыр өчен үз берләшмәбезне төзергә телибез. Бу эштә бик нык ярдәм итә торган кече элемтәләр көче», – диде ул.
Диана Василова катнашучыларны актив булырга өндәде. «Барыгыздан да катнашу, инициативалар һәм активлык көтәбез. Без күрмәгән яки башкача күргән нәрсәләрне, сез үз фикерегез белән тулыландыра аласыз», – дип аңлатты ул агентлык җитәкчелеге позициясен.
Дискуссиягә «Диалог Төбәкләр» оешмасының Татарстандагы бүлекчәсе җитәкчесе Марсель Гыйльмиев тә чакырылган иде. Ул яшьләр аудиториясенең медиа куллану турындагы тикшеренүләрнең яңа нәтиҗәләрен атады һәм бу шундук дискуссия китереп чыгарды.
«Без интернет массакүләм мәгълүмат чараларын куллану кимүен күрәбез, бу күпчелек очракта ясалма фәһем сервислары үсеше белән бәйле. Кешеләр мәгълүматны эзләү системаларында таба, беренче чыганак сайтларына күчеп тормый. Хәзер массакүләм мәгълүмат чаралары өчен шушы җыелган материалларга эләгү һәм мөмкин кадәр сыйфатлы контент ясау бик мөһим», – диде Марсель Гыйльмиев.
Фото: © «Татар-информ», Рамил Гали