Казанда светофорның кызыл утына чыккан автобус йөртүчесен җавапка тарттылар
Шәһәр автобусының светофорда кызыл ут янганда хәрәкәт итүен видеога төшереп, социаль челтәрләргә куйганнар.
(Казан, 7 гыйнвар, «Татар-информ»). Казанда светофорның кызыл утына чыккан автобус йөртүчесен җаваплылыкка тартканнар. Бу хакта республика автоинспекциясендә хәбәр иттеләр.
Социаль челтәрләрдә таралган видеода автобусның юл чатыннан, светофорда кызыл ут януга карамастан, узып китүе күренә. ЮХИДИ инспекторлары закон бозучыны ачыклаган. Ул Таҗикстанда туып-үскән 33 яшьлек ир-ат булып чыга. Шофер игътибары читкә юнәлү сәбәпле, кагыйдәләрне бозганлыгын әйткән.
Автобус йөртүчене административ җаваплылыкка тартканнар һәм штраф билгеләгәннәр. Әгәр дә ул кабат юл хәрәкәте кагыйдәләрен бозса, аңа тагын штраф, шулай ук ярты елга кадәр машина йөртү хокукыннан мәхрүм ителү яный.