Казанда спорт көне танылган спортчылар белән зарядкадан башланачак
Татарстан башкаласында шимбә көнне, 8 августта, спорт көне узачак. Төп мәйданчык «УРАМ» экстрим-паркы булачак, анда иртәдән үк шәһәр халкы һәм кунаклары өчен спорт активлыгы башланачак. Бу хакта «Татар-информ»да узган матбугат конференциясендә Казан Башкарма комитетының Физик культура һәм спорт комитеты рәисе Линар Гарипов хәбәр итте.
«Без Казанда спорт көне өчен күп төрле вакыйгалар уйлап таптык. Чара 8.30да массакүләм иртәнге зарядкадан башлана, аны атаклы спортчылар үткәрәчәк. Аннары спортның төрле төрләре буенча ярышлар узачак», - дип билгеләп үтте ул.
Фото: ©«Татар-информ», Рамил Гали
Чарага керү ирекле булачак, әмма кайбер активлыклар өчен конкрет команданы турнир челтәренә кертү алдан теркәлүне таләп итә, дип өстәде Гарипов.
«Казанда спорт көне – рекордлар уртак тарихка әйләнә торган бәйрәм, ә спорт барысын да берләштерә. Барыгызны да бу вакыйганың бер өлеше булырга чакырабыз», - дип йомгаклады ул.