Казанда «Шәрык базары» фестивале төгәлләнде

Казанда «Пирамида» күңел ачу комплексында «Шәрык базары» фестивале гала-концерты узды.

Концертны ябу тантанасында фестивальнең генераль продюсеры, Рәшит Ваһапов исемендәге татар мәдәнияте фонды директоры, Казан дәүләт мәдәният институты профессоры Рифат Фәттахов катнашты. Ул ярдәм өчен Татарстан Рәисенә, актив катнашу өчен аудиториягә һәм катнашучыларга рәхмәт әйтте.

«Зур рәхмәт сезгә! Казанда 12 көн дәвам иткән «Шәрык базары» фестивале ахырына якынлашып килә. Бу 12 көннең мизгел кебек кенә узып китүенә ышанып та булмый. Бу көннәр безнең илләрнең, төбәкләрнең, халыкларны, мәдәниятләребезнең берләшү мизгеле генә түгел, ә безнең йөрәкләрнең берләшү мизгеле дә булды», – диде ул.

«Шәрык базары» генераль продюсеры сүзләренчә, бүгенге концертта төрле илләрдән һәм төбәкләрдән килгән 326 артист катнашты.

Сәхнәдә Россия төбәкләреннән (Луганск Халык Республикасы, Кырым Республикасы, Чечня, Калмыкия, Хакасия, Татарстан, Башкортстан, Ингушетия, Тыва һәм Алтай), Кыргызстаннан, Мароккодан, Үзбәкстаннан, Кытайдан, Казахстаннан, Катардан, Төрекмәнстаннан, Мисырдан, Ливаннан, Абхазиядән, Согуд Гарәбстаннан, Ираннан, Сербиядән, Һиндстаннан һәм Гагаузиядән коллективлар, җырчылар һәм биючеләр катнашты.

Барлык катнашучылар да диярлек җыр-биюләрне милли киемнәреннән, шулай ук үз халыкларының музыка кораллары белән башкарган. Мәсәлән, Гагаузиядән Евдокия һәм Илья Кесяның вокал дуэты молдава милли коралы – най белән җыр башкарды.

«Без Комрат шәһәреннән килдек. Гагаузлар - Молдова көньягында яшәүче халык. Төрки телле, әмма православие дине тоталар. Без быел Татарстанда беренче тапкыр килдек, беренче тапкыр бу халыкара фестивальдә катнашабыз. Гагауз телендә үзебезнең авторлык җырын башкардык. «Birlik» тәрҗемәдә «бердәмлек» сүзен аңлата. Казанда булуыбызга бик шат, шулай ук Төркиягә дә концерт белән барасы килә», – дип сөйләделәр.

Дагыстаннан «Дербент» коллективы биючеләре авар һәм кумык биюләрен тәкъдим итте. Төркемнең сәнгать җитәкчесе Мурат Талибов халыкара фестивальнең югары дәрәҗәдә узуын әйтте.

«Һәр илнең һәм һәр коллективның үз эстетикасы, колориты бар, шуңа күрә һәр номер үзенчә ошады. Сербия, Кытай һәм Ливаннан катнашучылар белән танышып өлгердек», – диде Талибов.

Белградтан (Сербия) апалы-сеңелле Гобовичлар дуэты Татарстанда фестиваль оештыру өчен рәхмәт һәм хөрмәт белдерде. Мария һәм Марина киләсе елда Казанга кабат киләчәкләрен әйтте.

«Без Мәскәүдә һәм Санкт-Петербургта концертлар белән чыгыш ясадык инде һәм бу ике шәһәрдән дә матур тәэсирләр алдык, шуңа күрә Казанга да кабат киләсе килә. Бүген без серб телендә «Я хочу петь» җырын башкардык, аны Марина язды. Ул музыкага һәм биюгә мәхәббәт турында, кайвакытта авыр булса да музыкада дәва табып булу турында. Гомумән, безнең музыка ышаныч, гореф-гадәтләр, гаилә кыйммәтләре һәм мәхәббәт турында», – дип бүлеште апалы-сеңелле җырчылар.

Искәртеп үтик, «Шәрык базары» фестивале 2022 елда Казанда башланды һәм 20 илне һәм төбәкне җыйды.