Җәмгыять 2 апрель 2025 09:23

Казанда сәламәтлеге чикле кешеләр өчен шартлары булган социаль ипотека кварталы төзелә

Скопировать ссылку

Казанның «Салават күпере» торак районында яңа социаль ипотека кварталы төзелә башлады, ул 120 мең квадрат метрдан артык мәйданлы, 9-23 катлы 12 йортны үз эченә ала. Проект кысаларында «машинасыз ишегаллары» концепциясе гамәлгә ашырылачак, ә саф һавада йөрү, спорт белән шөгыльләнү һәм балалар уеннары өчен билгеләнгән җәяүлеләр бульвары иҗтимагый киңлекнең үзәге булачак.

Сәламәтлек мөмкинлекләре чикләнгән кешеләр өчен торакның үтемлелегенә аерым игътибар бирелгән – кайбер йортларның беренче катларында азмобиль гражданнар өчен җайлаштырылган фатирлар каралган.

Татарстан Рәисе Рөстәм Миңнеханов билгеләп үткәнчә, шәһәр һәм авыл архитекторлары, төзүчеләрнең хезмәте нәтиҗәсендә республикалар үзгәреш кичерүен дәвам итә, ә алда төбәкне тагын да масштаблырак проектлар көтә.

Хәзерге вакытта яңа кварталда 646 фатирлы дүрт йорт төзелә, аларның техник әзерлек дәрәҗәсе 4-11 процент тәшкил итә. Барлык фатирлар да кереп яшәргә әзер хәлдә тапшырылачак һәм кирәкле көнкүреш уңайлыклары: сантехника, электр плитәләре, янгын сигнализациясе датчиклары, су һәм электр энергиясе счетчиклары, шулай ук җылылыкны көйли торган приборлар белән җиһазландырылачак.

Дәүләт торак фондының инвестиция планы нигезендә, быел Татарстанда гомуми мәйданы 161,7 мең квадрат метрны тәшкил иткән 3274 фатирлы 35 торак йорт төзү ниятләнә. Хәзерге вакытта программа 32,4 процентка үтәлгән.

Дәүләт торак фонды тарафыннан гамәлгә ашырыла торган социаль ипотека «Яшәү өчен инфраструктура» илкүләм проектының төп бурычларыннан берсен – гражданнар өчен торакның үтемлелеген арттыру мәсьәләсен хәл итәргә ярдәм итә.

Сәхифәләр

Казанда сәламәтлеге чикле кешеләр өчен шартлары булган социаль ипотека кварталы төзелә