Казанда Сабан туена бүләкләрне дүрт маршрут буенча җыячаклар
Быел Татарстан башкаласында Сабан туена бүләкләрне 19 июньдә җыячаклар. Казан Башкарма комитеты җитәкчесенең социаль мәсьәләләр буенча урынбасары Гүзәл Сәгыйтова эшлекле дүшәмбедә шул хакта хәбәр итте.
Чара 11.00 сәгатьтә башлана һәм дүрт маршрут буенча уза:
- ТР Рәисенең Казан Кремлендәге резиденциясеннән Бауман һәм Кремль урамнары буенча,
- Муса Җәлил исемендәге опера һәм балет театрыннан Пушкин урамы буенча,
- «Туган авылым» комплексыннан Миңнуллин урамы буенча,
- Иске Татар бистәсе буенча.
Бүләкләр җыйганнан соң, 13.00 сәгатьтә барлык арбалар Камал театрының яңа бинасы янындагы мәйданчыкка җыелачак, анда кунаклар һәм шәһәр халкына театральләштерелгән тамаша тәкъдим ителәчәк.