Казанда Росгвардия оешкан көн уңаеннан тантаналы чара узды
Аларны һөнәри бәйрәмнәре белән Татарстан Республикасы Премьер-министры Илдар Халиков тәбрик итте.
Скопировать ссылку
(Казан, 25 март, «Татар-информ»). Бүген Казанда, "Ак Барс" яшьләр үзәгендә Россия Федерациясенең милли гвардия гаскәрләре Федераль хезмәт хезмәткәрләре һөнәри бәйрәме уңаеннан тантаналы чаралар узды. Росгвардиянең Татарстан буенча идарәсе хезмәткәрләрен һөнәри бәйрәмнәре белән Татарстан Республикасы Премьер-министры Илдар Халиков тәбрик итте.
Илдар Халиков үз чыгышында Татарстан Президенты Рөстәм Миңнехановның да котлау сүзләрен җиткерде. "Юкка гына бүгенге тантаналы чара бер минут тынлык белән башланмады. Әлеге хезмәт гомерне куркыныч астына куеп башкарыла. Хәзерге секундта, без зур тантаналы чарада вакытта, сезнең Татарстандагы, илнең калган почмакларындагы хезмәттәшләрегез тынычлык сагында", – дип билгеләп үтте Илдар Халиков.
Сүз уңаеннан, Росгвардия хезмәте бурычлары рәтенә: иҗтимагый тәртипне булдыру, мөһим объектлар һәм йөкләрне саклау, террорчылык һәм экстремизм белән көрәш, аеруча мөһим һәм режим объектларын саклау кебек вазифалар керә. Һөнәри бәйрәмнәре уңаеннан кайбер хезмәткәрләр идарә тармагы һәм Хөкүмәт бүләкләренә лаек булды.
