Хәвеф-хәтәр 14 февраль 2019 12:09

Казанда полиция хезмәткәрләре велосипед карагын тоткарлаган

20 яшьлек егет ике көпчәкле транспортны Универсиада проспектындагы йортлардан урлаган.

Скопировать ссылку

(Казан, 14 февраль, «Татар-информ»). Казанда полиция хезмәткәрләре велосипед карагын тоткарлаган. Бу хакта «Татар-информ» агентлыгына ТР буенча Эчке эшләр министрлыгының матбугат хезмәтеннән хәбәр иттеләр.

«Февраль башында «Таулар» полиция бүлегенә велосипед урлануы турында берничә гариза килгән. Җинаять эше материалларыннан күренгәнчә, зыян күрүчеләрнең барысы да – Универсиада проспектындагы йортларда яшәүчеләр», - дип белдерделәр ведомствоның матбугат хезмәтендә.

Шундый очракларның берсендә велосипед хуҗасы каракны күреп алып, аны тоткарламакчы булган, әмма егет качып өлгергән. Зыян күрүче бу хакта полицейскийларга хәбәр иткән.

Тәртип сакчылары видеокамерадагы язмаларны өйрәнеп, каракның эзенә төшкән. Берничә көннән соң «Таулар» полиция бүлеге хезмәткәрләре 20 яшьлек егетне кулга алган. Ул үз гаебен таныган һәм ике велосипедны ломбардка тапшыруын әйткән.

Егеткә карата җинаять эше кузгатылган.

#караклык

Сәхифәләр

Казанда полиция хезмәткәрләре велосипед карагын тоткарлаган