Казанда Лев Гумилевны искә алырлар

(Казан, 28 сентябрь, “Татар-информ”). 1 октябрьдә иртәнге сәгать 10да Петербургская урамында урнашкан Лев Гумилев һәйкәленә чәчәкләр салу тантанасы узачак. 3 октябрьдә исә С.Сәйдәшев исемендәге Зур дәүләт концерт залында Лев Гумилевка багышланган “Мин - халыклар һәм гасырлар үткән юлның шаһиты” (“Я видел путь народов и веков”) исемле Хәтер кичәсе үткәреләчәк.

Искә алу кичәсендә күренекле галим турында «Воскресать, умирать, жить» исемле фильм тәкъдим ителәчәк. Чарага килгән кешеләр шулай ук Лев Гумилев, танылган рус шагыйрәсе Анна Ахматова тормышын чагылдыра торган күргәзмә белән дә таныша алачак. Программада шулай ук “Яңа музыка” ансамбле, Миләүшә Тәминдарова җитәкчелегендәге Дәүләт камера хоры, Г.Тукай исемендәге Татар дәүләт филармониясе башкаручылары чыгышы да каралган, дип хәбәр итә “Татаркино” оешмасының матбугат бүлеге.