Казанда Кукмара районының Мәдәният көнен үткәрделәр

22 сентябрьдә Г.Тукай исемендәге Татар дәүләт филармониясендә «Татарстанның мәдәни башкаласы» конкурсы кысаларында Кукмара муниципаль районы үзенең уникаль мәдәни мирасын тәкъдим итте. Татар филармониясе скверында «Сөмбелә-2023» беренче уңыш күргәзмә-ярминкәсе тәкъдим ителде. Беренче уңыш бәйрәме район бакчачылары үстергән үзенчәлекле яшелчәләр һәм җиләк-җимешләр белән бизәлгән. Бу хакта «Хезмәт даны» хәбәр итә.

Парк территориясенә керү урынында милли киемнәрдән егет-кызлар һәм Кукмараның һәвәскәр музыкантлары кунакларны халык җырлары белән каршы алды һәм тамашачыларны төрле уеннарга, халык биюләренә, мастер-классларга җәлеп иттеләр.

Мәдәни чарада Казан халкы өчен шулай ук Кукмара районы авыл хуҗалыгы казанышлары күргәзмәсе, предприятиеләр һәм шәхси эшмәкәрләр җитештергән продукцияләрне сату да оештырылган иде. Филармония фойесында интерактив программа белән күргәзмә мәйданчыгы тәкъдим ителде, анда һәр килүче тамашачы халык иҗаты атмосферасында кайнады.

Монда Кукмара төбәге осталарының декоратив-гамәли сәнгате күргәзмәләре белән танышырга, осталар җитәкчелегендә борынгы һөнәрчелек нигезләренә кушылырга һәм үзләренең уникаль эшләрен булдырырга мөмкинлек барлыкка килде.

Филармониянең концертлар залында «Кукмарам — минем горурлыгым! « исеме астында концерт программасы тәкъдим ителде. Концерт кысаларында 450гә якын район иҗат коллективлары һәм республиканың танылган мәдәният эшлеклеләре, җырчы-биючеләре районның иҗат тормышының күпмилләтле палитрасын тәкъдим итте.

Программа барышында тамашачылар Кукмара төбәге территориясендә яшәүче халыкларның бәйрәмнәре һәм йолалары атмосферасына чумды. Фольклор, вокал, хореография һәм инструменталь ансамбльләр үз иҗатында мәдәният, көнкүреш һәм традицияләрнең үзенчәлеген чагылдырган концерт номерларын тәкъдим итте.

«Туристик маршрут» темасына багышланган концертта тамашачылар Кукмара районында яшәүче татар, рус, удмурт, мари һәм керәшеннәрнең барлык мөһим мәдәни вакыйгалары һәм бәйрәмнәре белән танышты.

Бәйрәм кунакларын район башлыгы Сергей Димитриев, Дәүләт Советы депутатлары Римма Ратникова, Камил Нугаев, Татарстан Республикасы мәдәният министры урынбасары Ленар Хәкимҗанов сәламләде.