Казанда «Казан сөлгесе» IX халыкара фестиваленә гаризалар кабул итү башланды
Казанда «Казан сөлгесе» IX Халыкара халык җыр һәм бию сәнгате фестиваль-конкурсына гаризалар кабул итү башланды. Әлеге мәдәни чара ЮНЕСКО ярдәмендә 28–30 августта узачак. Иҗади бәйгенең йомгаклау гала-концерты Татарстан Республикасы көне һәм Шәһәр көненә багышланган тантаналы бәйрәм программасының бер өлешенә әверелечәк. Бу хакта Казан мэриясе матбугат хезмәте хәбәр итә.
Фестиваль кысаларында үзләренең иҗади сәләтләрен һөнәри артистлар да, һәвәскәр иҗат коллективлары да тәкъдим итә ала. Оештыручылар талантларны ачыклауда яшь чикләве куймый: сәхнә түренә дүрт яшьтән өлкәнрәк булган барлык башкаручылар чакырыла. Конкурс үзенең һөнәри осталыгын чагылдыручы биш төп номинация буенча узачак: халык җыры, халык биюе, халык уен кораллары музыкасы, шулай ук нәфис башкарудагы җыр һәм бию ансамбльләре, дип хәбәр итә Мәдәният идарәсе.
«Казан сөлгесе» фестивале 2019 елдан бирле үткәрелә. Аның төп максаты – буыннардан-буынга күчеп килгән милли җыр һәм бию сәнгатен саклау, мәдәни хәзинәбезне таныту, шулай ук катнашучылар арасында кыйммәтле тәҗрибә уртаклашу өчен һөнәри мәйданчык булдыру һәм яшь талантларга адым ясарга ярдәм итү. Бәйгедә катнашу тулысынча бушлай. Гаризалар 20 августка кадәр kazanskoe.polotentse@bk.ru электрон почтасына кабул ителә. Халыкара проектта катнашу шартлары белән тулырак рәсми нигезләмәсендә танышырга мөмкин.