Җәмгыять 12 апрель 2018 15:51

Казанда күз табиблары күз авыруларын дәвалауның яңа алымнары турында тәҗрибә уртаклашачак

Республика клиник офтальмология хастаханәсеннән күрсәтмә операция трансляцияләнәчәк.

Скопировать ссылку

(Казан, 12 апрель, “Татар-информ”, Гөлнар Гарифуллина). Иртәгә “Корстон” комплексында “Офтальмологиядә яңа технологияләр” традицион еллык Бөтенроссия фәнни-гамәли конференциясендә күз табиблары тәҗрибә уртаклашачак. Бу хакта Татарстанның Сәламәтлек саклау министрлыгының матбугат хезмәте хәбәр итә.

Чарада күз авыруларын дәвалауның яңа алымнары, югары технологияле операцияләр һәм башка актуаль мәсьәләләр буенча фикер алышачаклар. Конференциядә Россиянең дәвалау оешмалары һәм институтларыннан профессорлар, офтальмологлар чыгыш ясаячак.

Конференция кысаларында Республика клиник офтальмология хастаханәсеннән күрсәтмә операция трансляцияләнәчәк. Татарстан һәм Россиянең тәҗрибәле хирурглары катлаулы күз патологияләренә дучар булган пациентларга операцияләр ясаячак.

Шәфкать туташлары өчен “Офтальмологиядә шәфкать туташлары эше” фәнни семинары узачак. Россиянең төрле шәһәрләреннән шәфкать туташлары киләчәк. Секция кысаларында теоретик өлештән тыш, хирургия җиһазында Ветлаб-практик дәресләр дә узачак.

Шулай ук, конференция кысаларында күрү сәләтен яхшырту юнәлеше – оптометрия буенча фәнни семинар үткәрелә.

#Сәламәтлек саклау министрлыгы #офтальмология

Сәхифәләр

Казанда күз табиблары күз авыруларын дәвалауның яңа алымнары турында тәҗрибә уртаклашачак