Казанда IX Бөтенроссия татар журналистлары форумы башлана
Бүген Казанда IX Бөтенроссия татар журналистлары форумы үз эшен башлап җибәрә. Ул массакүләм мәгълүмат чаралары вәкилләрен, блогерларны һәм медиа өлкәсендә эшләүче белгечләрне бер мәйданга җыячак. Бу хакта Бөтендөнья татар конгрессы матбугат хезмәте хәбәр итә.
Форумның эше бүген 14:00 сәгатьтә Бөтендөнья татар конгрессы, «Татмедиа» агентлыгы җитәкчеләре һәм медиа җәмәгатьчелеге вәкилләре катнашында тантаналы ачылыш белән башлана.
Форумның эшлекле программасы кысаларында сәгать 15:00 дә Бөтендөнья татар конгрессының яңа сайты тәкъдим ителәчәк. Аннары катнашучылар журналист һәм танылган блогер Альберт Шакиров белән очрашачак.
Программа танылган журналист һәм блогер Рәмис Латыйпов үткәрәчәк «Иҗат теориясе» лекциясе белән дәвам итәчәк. Катнашучылар иҗади эшчәнлеккә кагылышлы мәсьәләләр, шулай ук хәзерге медиа мохитендә эшләү үзенчәлекләре турында фикер алышачак.
Кичке аштан соң катнашучылар Кәрим Тинчурин исемендәге Татар дәүләт драма һәм комедия театрына «Әни килде» спектаклен карарга барачак.