Казанда ишегалларның 80 проценты төзекләндерелгән
Татарстан башкаласында «Безнең ишегалды» программасы алтынчы ел эшли. Быел 4,3 млрд сумга 466 ишегалды территориясе төзекләндерелде. Бу хакта мэриядә узган «эшлекле дүшәмбе» киңәшмәсендә Казанның Тышкы төзекләндерү комитеты рәисе Альберт Шәйнуров хәбәр итте.
Шәһәр буенча барлыгы 600 мең квадрат метр асфальт яңартылган, 5 меңнән артык кече архитектура формалары куелган һәм 120дән артык яңа чүп җыю мәйданчыгы ясалган. Эш нәтиҗәләре буенча, халык өчен 5 мең яңа машина кую урыны барлыкка килгән.
Программа эшләгән алты ел эчендә шәһәрнең барлыгы 2,7 мең ишегалды яңартылган. Бу – 3,6 миллион квадрат метрдан артык асфальт һәм Казанның 600 меңнән артык кешесе өчен 30 мең яңа машина кую урыны дигән сүз. Бүгенге көндә ремонт таләп ителгән ишегалларының 80 процентка якыны төзекләндерелгән.