Дин 22 декабрь 2009 11:00

Казанда иртәгә “2009 ел мөслимә туташы” бәйгесе финалы уза

Конкурста кияүдә булмаган, актив, акыллы, Ислам динен тотучы, милли гореф-гадәтләрне, милли аш-су төрләрен әзерли белгән кызлар катнаша

Скопировать ссылку

(Казан, 22 декабрь, “Татар-информ”, Римма Гатина). Иртәгә – 23 декабрьдә Казанда Татар дәүләт гуманитар-педагогика университетында “2009 ел мөслимә туташы” бәйгесенең финалы уза. 18-25 яшьлек мөслимә туташлар арасында конкурс ТР Мөслимәләр берлеге Татар дәүләт гуманитар-педагогика университеты һәм Ислам фәнен, мәдәниятын һәм мәгарифен үстерү фонды белән берлектә оештырыла.
Оештыру комитетыннан алынган хәбәрләргә караганда, бәйгенең республиканың хатын-кызлар хәрәкәтен үстерү, әхлакый кыйммәтләрне пропагандалау, сафлык-пакълык, мөслимәнең максатчанлыгы турында җәмәгатьчелек фикерен формалаштыру, татар халкының элек-электән килгән гореф-гадәтләрен торгызу, гаилә мөнәсәбәтләренә өйрәтүдә булышлык итү һ.б. максатларны күз алдында тота.
Конкурста кияүдә булмаган, актив, акыллы, Ислам динен тотучы, милли гореф-гадәтләрне, милли аш-су төрләрен әзерли һәм кичектергесез медицина ярдәмен күрсәтә белгән, флористика серләренә төшенгән, милли төсмердәге киемнәрне тәкъдим итә алган кызлар катнашу мөмкинлегенә ия.

Сәхифәләр

Казанда иртәгә “2009 ел мөслимә туташы” бәйгесе финалы уза