Казанда «Йортлар һәм язмышлар. Островский / Вознесенская урамы» ачык пленэры узачак
Казанда Островский урамында зур ачык пленэр үткәреләчәк. Чарада рәссамнар, студентлар, сәнгать мәктәпләре укучылары, шулай ук рәсем ясарга яратучы һәркем катнаша алачак. Бу хакта ТР Мәдәният министрлыгы хәбәр итә.
Пленэрның төп темасы — Казанның бүгенге Островский урамы, аның йортлары, ишегаллары, архитектура детальләре, үтеп баручылары, яшәүчеләре һәм көндәлек тормышы. Оештыручылар урамны тарихи урын буларак кына түгел, ә үткән белән бүгенгене очраштыручы тере киңлек итеп күрсәтергә тели.
Катнашучылар теләсә кайсы сюжетны сайлап, үзләренә якын техникада (нәкышь, графика, акварель, скетчинг яки цифрлы рәсем) эшли алачак.
Пленэр таныш урамга яңача карарга, аның тарихына, архитектурасына һәм кешеләренә игътибар итәргә ярдәм итәчәк.
Чара шәһәр мирасын саклау темасы тирәсендә рәссамнарны, шәһәр халкын, музейны, сәнгать мәктәпләрен һәм туган якны өйрәнүчеләрне берләштерергә ярдәм итәчәк.
Пленэр рәссамнар очрашуы гына түгел, ә урамның бүгенге кыяфәтен саклап калу ысулы да булачак. Ул тарихны, сәнгатьне һәм тере кеше язмышларын берләштерергә ярдәм итәчәк. Шәһәр халкы гадәти урамны төрле рәссамнар күзлегеннән күрү мөмкинлегенә ия булачак.
Чара башында катнашучылар теркәлү узачак һәм урам буйлап аудиогидка сылтама алачак. Аны татар яки рус телендә тыңлап булачак. Соңрак рәссамнар Островский урамындагы төрле нокталарда картиналар иҗат итә башлаячак.