news_header_top_970_100
news_header_bot_970_100

Казанда иң яхшы азан әйтүчене ачыклаячаклар

Казанда иң яхшы азан әйтүчене ачыклаячаклар
Рамил Гали

19 май 10.00 сәгатьтә Казанның Кол Шәриф мәчетендә  «Татар азаны-2022» III бөтентатар бәйгесенең финал этабы узачак.

«Тәртип» радиосы, «Рухи моң» иҗат берләшмәсе һәм Татарстан Диния нәзарәте белән берлектә оештырылган әлеге бәйгедә Татарстаннан һәм Республикадан читтә яшәүче барлыгы йөздән артык кеше көч сынашкан, нәтиҗәдә финалга бары 10 катнашучы чыккан.  Узган еллардан аермалы буларак быел конкурста катнашырга теләүчеләр  иң элек азанны дөрес әйтү буенча тест узарга, «Татар азаны мәктәбе» тарафыннан оештырылган онлайн дәресләрне үзләштерергә һәм шуннан соң гына азан әйткән видеоларын җибәрергә тиеш булалар.

19 май көнне узачак финалның жюри комиссиясендә Татарстанның халык артисты, профессор Миңгол Галиев, Россия мөселманнарының Диния нәзарәте башлыгы Әлбир хәзрәт Крганов, Татарстанның баш казые Җәлил хәзрәт Фазлыев һәм башкалар, шул исәптән «Тәртип» радиосы вәкиле дә бар.

Җиңүчегә «Татар мөәзине»  исеме һәм «Тәртип» радиосында азан әйтү хокукы тапшырылачак. Бүләкләү чарасы шул ук көнне Казан Экспо үзәгендә оештырылган халыкара икътисади саммит кысаларында узачак.

news_right_column_1_240_400
news_right_column_2_240_400
news_bot_970_100