Казанда II «Гәүһәр» балалар фестиваленә нәтиҗә ясалачак

13 февральдә 15.00 сәгатьтә Казанның «Чулпан» мәдәният үзәгендә «Гәүһәр» балалар фестивале узачак: бер сәхнәдә татар мәдәниятенең берничә сәнгать төре берләшәчәк.

«Дүрт ай дәвамында, узган елның сентябрь-декабрь аралыгында, Казан мәктәпләренең меңнән артык укучысы һәм балалар бакчаларында тәрбияләнүче 250гә якын бала татар биюе хәрәкәтләре, сөйләм осталыгы һәм татар милли уен коралларында уйнарга һәм җырларга өйрәнде. Шуны искәртеп үтәргә кирәк, әлеге балаларның күбесе өчен бу – яңа юнәлеш», - дип хәбәр итә Казан мэриясе матбугат хезмәте.

«Гәүһәр» фестивалендә дәресләрнең нәтиҗәсе буларак, бер сәхнәдә татар мәдәниятенең берничә сәнгать төре бер-берсе белән үрелеп биреләчәк. Биредә укучылар һәм балалар бакчаларында тәрбияләнүчеләр 20 дәрес эчендә алган күнекмәләрен күрсәтәчәк, диелә хәбәрдә.

Чарада Казан шәһәре мэры Илсур Метшин, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов, Казан шәһәре Башкарма комитеты җитәкчесе урынбасары Гүзәл Сәгыйтова катнашуы көтелә.

Проектның максаты – татар мәдәниятен һәм татар телен популярлаштыру, туган телгә кызыксыну уяту, балаларны сәнгатькә якынайту. Проектны Казан мэриясе Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән тормышка ашырды. Анда Казанның 46 мәктәбе, 20 балалар бакчасы, 53 остаз катнашты. Һәр белем учреждениесендә 15-20шәр укучы шөгыльләнде.

«Дәресләрдә балалар профессиональ биючеләр, укытучы-хореографлар ярдәмендә татар биюе хәрәкәтләрен үзләштерделәр. Сөйләм сәнгате буенча остазлар – театр артистлары һәм телевидение алып баручылары – укучыларны әдәби әсәрләрне дөрес һәм сәнгатьле итеп укырга өйрәтте. Вокал дәресләрендә җырлау сәләтләрен ачтылар, татар халкының милли уен коралларында уйнарга өйрәнеп, инструменталь ансамбль булдырырга тырыштылар. Дәресләр татар телендә узды», - диде Казан мэриясе матбугат хезмәте.

Фестивальгә сайлап алу туры 22 гыйнварда Казанның 18 нче гимназиясендә булган. Жюри әгъзалары – Россиянең атказанган, Татарстанның халык артисты Зөфәр Харисов, Татарстанның атказанган артисты Ләйсән Закирова, Татарстанның атказанган артисты, балетмейстер Таһир Латифуллин, Кәрим Тинчурин театры артисты Артем Пискунов, «Казан» бию ансамбле солисткасы Татьяна Мифтахова, фольклорчы, галим, музыкант Дамир Габдрахманов, «Болгар кызлары» төркеме җитәкчесе һәм солисты Айгөл Зәйнуллина һәм «Апуш» татар балалар театр студиясе җитәкчесе Алия Фәйзрахманова.

• «Хәрәкәттә – бәрәкәт» һәм «Сөйлә» проектларының беренче сезоны 2022 елның февраль-май айларында тормышка ашырылды. Проектлар май аенда Казанның 180 нче номерлы күппрофильле полилингваль гимназиясендә йомгаклау чарасы белән тәмамланды. 2022 елның сентябрь-декабрь айларында үткән икенче сезон дәресләренең йомгаклау чарасы «Чулпан» мәдәният үзәгендә «Гәүһәр» балалар фестивале булып узды. 2023 ел сезонында бию һәм сөйләм осталыгына ике яңа юнәлеш өстәлгәннән соң, проект тулысы белән «Гәүһәр» исемен алды.