Казанда Гагаузия автономияле-территориаль берәмлеге вәкиллеге ачылачак
Очрашуда катнашучылар Татарстан белән Гагаузия арасындагы эшлекле мөнәсәбәтләрнең үсештә булуын билгеләп үттеләр.
(Казан, 25 май, "Татар-информ"). Кичә Татарстан Республикасы Президенты Рөстәм Миңнеханов ПХИФ-2018 кысаларында Гагаузия автономияле-территориаль берәмлеге (Молдова Республикасы) башлыгы Ирина Влах белән очрашты. Бу хакта Татарстан Президенты матбугат үзәге хәбәр итә.
Очрашуда катнашучылар Татарстан белән Гагаузия арасындагы эшлекле мөнәсәбәтләрнең уңай динамикасын билгеләп үттеләр, хезмәттәшлекнең барлык мәсьәләләре буенча системалы багланышлар булдыру турында килештеләр.
Аннары Рөстәм Миңнеханов һәм Ирина Влах Татарстан Республикасы Хөкүмәте белән Гагаузия автономияле-территориаль берәмлегенең Башкарма комитеты арасында Казанда Гагаузия вәкиллеген ачу турында килешү имзаладылар.