news_header_top_970_100
news_header_bot_970_100

Казанда футбол җанатарларын “матчапури” һәм туп рәвешендәге чәк-чәк белән сыйлаячаклар

Шәһәр рестораннары футбол буенча чемпионат кунакларына махсус меню һәм тематик өстәлләр эшләгән.

Казанда футбол җанатарларын “матчапури” һәм туп рәвешендәге чәк-чәк белән сыйлаячаклар
Султан Исхаков

(Казан, 7 май, “Татар-информ”). Казан рестораннары һәм кафелары футбол буенча чемпионат кунакларына махсус меню әзерләгән. Бу хакта “Татар-информ” мәгълүмат агентлыгында матбугат конференциясендә Казан рестораторлар һәм отельерлар ассоциациясе идарәсе рәисе Зөфәр Гаязов сөйләде.

Аның сүзләренчә, туклану оешмалары ФИФА символикасы белән десертлар әзерләячәк. Мәсәлән, футбол җанатарларына “матчапури” һәм туп рәвешендәге чәк-чәк тәкъдим итәчәкләр.

Мәсәлән, грузин кухнясының бер рестораны җанатарларны “матчапури” – страус йомыркасы белән эшләнгән хачапури белән сыйлаячак. Шундый ук ризык, тик бытбылдык йомыркасы белән Казан кафеларында Конфедерацияләр кубогы вакытында узган ел тәкъдим ителгән иде. Ул чакта Татарстан Президенты Рөстәм Миңнеханов башка кафе һәм рестораннар да креатив идеяне хуплап, 2018 елгы футбол буенча чемпионат вакытында бу ризыкны гамәлгә кертү теләген әйтте.

Зөфәр Гаязов страус йомыркасыннан хачапурины Австралия җанатарларына тәкъдим итү мөмкинлеген әйтте.

Казан рестораторлар һәм отельерлар ассоциациясе идарәсе рәисе сүзләренчә, кайбер Казан рестораннары чемпионат кунаклары өчен менюны инглиз, немец, кытай, япон, испан һәм корея телләрендә әзерләгән.

news_right_column_1_240_400
news_right_column_2_240_400
Медиаметрикс
news_bot_970_100