Хәвеф-хәтәр 16 июнь 2017 07:19

Казанда дары заводы территориясендә янгын чыккан

Янгын 99 кеше һәм 34 берәмлек техника көче белән сүндерелгән.

Скопировать ссылку

(Казан, 16 июнь, "Татар-информ"). Бу төндә Казанда дары заводы территориясендә янгын чыккан. Гадәттән тыш хәл турында хәбәр "ГЛОНАСС+112" системасы буенча 02.45 сәгатьтә алынган. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәте җиткерде.

Урынга килгән янгын сүндерү хезмәткәрләре дары заводы территориясендә аерым торган бинаның януын ачыклый. Янгын 300 квадрат метр мәйданга таралган була.

"Казан халкына янгынның зыяны юк. 04.00 сәгатькә 400 квадрат метрга таралып өлгергән янгын камап алынды һәм 22 минуттан ачык ут сүндерелде. Зыян күрүчеләр һәм үлүчеләр юк. Янгынны сүндерүдә 99 кеше һәм 34 берәмлек техника катнашты", – дип хәбәр итте Татарстан Гадәттән тыш хәлләр министрлыгының матбугат белән эшләү бүлеге җитәкчесе Андрей Родыгин.

#Дары заводы #янгын

Сәхифәләр

Казанда дары заводы территориясендә янгын чыккан