Казанда, Чаллыда һәм Әлмәттә «Ислам. Беренче адымнар» курслары башлана
Татарстан Диния нәзарәте тарафыннан намаз укырга һәм Ислам дине нигезләренә өйрәтүче «Ислам. Беренче адымнар»ның яңа сезоны Казан, Чаллы һәм Әлмәт шәһәрләрендә ачыла.
Казанда беренче дәрес 2024 елның 5 октябрендә нәзарәт бинасында (Г.Тукай ур., 38) иртәнге сәгать тугызда (9:00) узачак. Дәресләрне мөфтиятнең волонтер яшьләр хәрәкәте вәкилләре алып барачак. Аерым алганда, шәкертләр госел һәм тәһарәт алырга, намаз укырга өйрәнәчәк; гакыйдәнең асылына төшенәчәк, сира – Мөхәммәд пәйгамбәрнең с.г.в. тормышы белән танышачак, ураза тәртипләре буенча дәресләр тыңлаячак. Соңгы дәрес – 23 ноябрьдә – ул көнне Коръән мәҗлесе, курсларга йомгак ясау, сертификатлар тапшыру көтелә.
Курсларда катнашу өчен шушы сылтама буенча кереп теркәлергә яки +7 (843) 237-86-18 телефоны буенча шалтыратырга кирәк.
Мөфтиятнең популяр булган проекты башка шәһәрләрдә дә эшли башлый. 2024 елның 6 октябреннән (якшәмбе көнне) Әлмәт шәһәренең Ризаэддин Фәхреддин исемендәге яңартылган Үзәк мәчетендә (Мәрҗани ур., 82А) «Ислам. Беренче адымнар» курслары башлана. Дәресләр – барлыгы 5 очрашу – ике төркемдә үткәреләчәк: ир-атларны Әлмәт мәчетләре имамнары, ә хатын-кызларны Әлмәт мәдрәсәсе студентлары укытачак. Шулай ук балалар өчен аерым төркемнәр булачак (малайлар һәм кызлар өчен аерым). Дәресләр вакыты – һәр якшәмбе сәг. 9.00дән 12.00гә кадәр. Укучылар Нәзарәт тарафыннан басылып чыккан китаплар, методик материаллар буенча белем алачак. Курсларга язылу өчен телефон: 89172663030.
Чаллыда 14 сентябрьдән алып 5нче октябрьгә кадәр барлык теләүчеләр – ир-атлар һәм хатын-кызлар өчен «Ислам. Беренче адымнар» дәресләре үткәреләчәк. Дәресләр «Җәмигъ», «Тәүбә», «Ихлас», «Чишмә», «Чаллы Яр» мәчетләрендә, шулай ук «Тәрбия» үзәгендә узачак. Узган ялларда курсларга язылучылар белән очрашу узды, барлыгы 150 кеше килде. Хәзерге вакытта курсларга язылу тәмам.
«Ислам. Беренче адымнар» проекты Татарстан мөфтияте тарафыннан 2018 елда тормышка ашырыла башлады. Унөч сезон дәвамында әлеге курсларда 1400гә якын кеше белем алды һәм намазга басты.