news_header_top_970_100
news_header_bot_970_100

Казанда Бөтенроссия татар дин әһелләре җыены ачылды

Казанда Бөтенроссия татар дин әһелләре җыены ачылды
tatar-congress.org

Бүген Казанда Бөтенроссия татар дин әһелләре җыенын ачу тантанасы узды. Тантаналы чарада Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев катнашты. Бу хакта Бөтендөнья татар конгрессы хәбәр итә. 

«2022 елда Бөтенроссия татар дин әһелләре җыены Идел буе Болгар дәүләтендә Ислам динен кабул итүнең 1100 еллыгына багышланган. Бүген бирегә 5 чит ил һәм Россиянең 76 төбәгеннән дин эшлеклеләре килде… Әлеге форум тәжрибә уртаклашу, актуаль мәсьәләләр хакында фикер алышу урыны булыр, безне тагын да берләштерер», – дип ассызыклады Милли Шура рәисе үзенең чыгышында. 

Форумны ачу тантанасы моңлы азан тавышы белән дәвам итте. Шулай ук Бөтендөнья татар конгрессының Рәхмәт хатлары һәм медальләре тапшырылды, «Татар азаны» бәйгесенең җиңүчеләре бүләкләнде.

Рәсми өлештән соң делегатлар хәләл индустриянең «Russia Halal Expo» халыкара күргәзмә экспозициясе белән таныштылар.

Иртәгә форум делегатлары катнашында Казанның Жәмигъ мәчетендә нигез ташы салу тантанасы, җыенның пленар утырышы, 21 май көнне исә Болгар шәһәрендә 1100 еллыкны бәйрәм итү чаралары планлаштырылган.

news_right_column_1_240_400
news_right_column_2_240_400
news_bot_970_100